སེམས་རྟོགས་ཁ་རིག་གཞུང་སློབ་གྲྭ་པ་ཡོངས་ལ་གདམས་པ།

བླམ་ ཆོས་སྐྱོང་།

༉ཨ་ཧོ༑ ཀ་དག་སྟོང་ཉིད་དབྱིངས་སུ་སྤྲོས་པ་ཀུན་བྲལ་ཡང་། །ཁ་དོག་སྣང་ཆའི་མཚན་དཔེའི་དཀྱིལ་འཁོར་དེ་རྫོགས་ཤིང་། །

ག་བུར་ཐུགས་རྗེའི་བདུད་རྩི་ཕྱོགས་མེད་དུ་བརྡལ་བ། །ང་ཡི་བླ་མ་རབ་གསལ་ཟླ་བ་དེ་མཁྱེན་ནོ། །

ཅ་ཅོས་གཞན་ལ་སྤང་བླ་ལེགས་བཤད་རེ་སྨྲ་ཡང་། །ཆ་ལུགས་རང་རྒྱུད་ཆོས་དང་ཡ་བྲལ་དུ་སོང་བ། །

ཇ་ཆང་དུག་ཆུས་གཟིར་འདྲའི་སྤྲང་སྨྱོན་གྱི་ངག་ནས། །ཉ་མ་གཅེས་ཕྲུག་ཚོགས་ལ་སྙིང་གཏམ་ཞིག་འཆད་དོ། །

ཏ་ཐཱ་ག་ཏའི་བསྟན་པ་ལུང་རྟོགས་ཀྱི་ཉིན་འབྱེད། །ཐ་མལ་སྙིགས་དུས་བྱིས་པའི་བསམ་སྦྱོར་ལ་སྐྱོ་བས། །

ད་ནས་ཆུ་ལྡན་རི་བོའི་ཕང་པ་རུ་ཡིབ་རན། །ན་གཞོན་བསྟན་འགྲོར་སྙིང་སྟོབས་གོ་ཆ་ཞིག་གྱོན་དང་། །

པ་ཏྲ་རི་མོ་ཅན་གྱི་ཁང་བཟང་དུ་བཞུགས་མཁན། །ཕ་མ་སློབ་དཔོན་རྒན་རབས་ལས་འབྲེལ་གྱི་སྤུན་ཟླ། །

བ་མོས་བེའུར་སྐྱོང་འདྲའི་བརྩེ་གདུང་གི་སྒོ་ནས། །མ་ལུས་གོང་དུ་བཀུར་བ་ཡ་རབས་ཤིག་མཛད་དང་། །

ཙ་རི་སྨྱུག་མ་ལས་ལྷག་རྟེན་བཟང་དེ་ཐོབ་ཚེ། །ཚ་ཟེར་ཅན་གྱི་ཟླ་མིན་ཐོས་བསམ་གྱི་སྒྲོན་མེ། །

ཛ་ལང་སྤྱོད་ངན་ཆར་སྤྲིན་རང་ས་རུ་ཞི་བས། །ཝ་ལེར་བག་ཡོད་ངང་ནས་ལྔ་རིག་ལ་སྦྱོངས་ཤིག །

ཞྭ་ལྟར་འཇམ་དབྱངས་བླ་མ་སྤྱི་བོ་རུ་སྒོམ་སྟེ། །ཟ་ཡུན་ཙམ་ལའང་གཡེལ་མེད་གཟུངས་སྔགས་དེ་བཟླས་ན། །

འ་ཅག་འཆད་རྩོད་རྩོམ་པའི་བགྱི་བ་ལ་འབད་ཚེ། །ཡ་མཚན་ཆེ་བའི་ལུང་རིགས་ལྷ་མཆོག་གིས་སྩལ་འོང་། །

རྭ་བ་ཙན་དན་ཚང་ཚིང་འཁྲིགས་པ་ཡི་ལྗོངས་སུ། །ལ་ལ་ཙམ་མིན་ཆོས་སྲིད་ཡོངས་རྫོགས་ཀྱི་མངའ་བདག །

ཤ་ཚས་འབངས་ལ་བརྩེ་བ་བྱང་སེམས་ཀྱི་ཁྱད་ཆོས། །ས་བཅུའི་སེམས་དཔའ་དངོས་ཡིན་གཙུག་རྒྱན་དུ་འཁུར་དགོས། །

ཧ་ཅང་སྐུ་དྲིན་ཆེ་བ་དཔལ་ལྡན་གྱི་འབྲུག་གཞུང་། །ཧ་ལམ་རང་དོན་སེམས་པས་དྲིན་ལན་དེ་འཇལ་དཀའ། །

ཨ་རོགས་རྒྱུ་འབྲས་དཔང་བཙུགས་ངོ་ལྐོག་དང་བྲལ་བའི། །ཨ་ལ་ལ་ཧོའི་ཞབས་ཏོག་ལྷོད་མེད་དུ་སྒྲུབས་ཤིག །

ཟབ་དོན་མཚར་སྡུག་རྫོགས་པའི་སྨིན་ལེགས་ཀྱི་མགྲིན་པར། །སྙན་ཚིག་ནོར་བུའི་རྒྱན་གྱི་སྤུད་པ་དེ་བྲལ་ཡང་། །

འགའ་ལ་ཡིད་དབང་འགུགས་པའི་མཆོད་སྤྲིན་དུ་གྱུར་ན། །དགེ་བས་འགྲོ་ཀུན་འཇམ་དཔལ་གཞོན་ནུ་རུ་གྱུར་ཅིག །

ཨེ་མ་རྗོད་བྱེད་གསལ་བྱེད་སུམ་ཅུ་ལ་བརྟེན་ནས། །བརྗོད་བྱ་ཆོས་དང་འཇིག་རྟེན་འདྲེས་མ་ཡི་བསླབ་བྱ། །

སྤྲང་སྨྱོན་དྷརྨ་པཱ་ལ་སྐྱིད་ཉལ་གྱི་ངང་ནས། །མི་བདག་འཇིགས་རྣམ་བཤེགས་པའི་གཟིམ་ཁང་ནས་ཕུལ་ལོ། །

ཞེས་པའང་ ཁྲོ་བོ་ཟད་པ་ཤིང་མོ་གླང་ལོ་སྨིན་དྲུག་ཟླ་བའི་སྐར་ཕྱོགས་དགེ་བར་ གསང་སྔགས་ཟབ་དོན་ཆོས་རྫོང་ནས་བྲིས་པ་དགེ་ལེགས་སུ་གྱུར་ཅིག །    ། །

ལྷོ་བྲག་མཁར་ཆུའི་གནས་ཀྱི་དྲན་བསྟོད་ལྷག་བསམ་ཟླ་བའི་འཛུམ་ཟེར་བཞུགས་སོ། །
འབྲི་མི་ དྲུང་འཚོ་ ཤེས་རབ་འབྱོར་ལྡན།

ཨོཾསྭསྟི་བི་ཛ་ཡ། དུས་གསུམ་རྒྱལ་བ་ཀུན་འདུས་སྤྱི་གཟུགས་སུ་ཤར་བའི། །མཁྱེན་བརྩུ་ནུས་པའི་ཡོན་ཏན་གཅིག་བསྡུས་ཀྱི་ཕུང་པོ། །འཛམ་གླིང་སྤྱི་དང་བྱེ་བྲག་གངས་ཅན་གྱི་མགོན་གཅིག །མཚོ་སྐྱེས་རྡོ་རྗེའི་ཞབས་ལ་སྙིང་དབུས་ནས་འདུད་དོ། །གུ་རུའི་ཐུགས་ཀྱི་དབེན་གནས་ལྷོ་བྲག་གི་མཁར་ཆུའི། །གནས་ཀྱི་བཞུགས་ཚུལ་རྣམ་པ་ཅུང་ཟད་ཅིག་འབྲི་ན། །གཏེར་བདག་གནས་ཀྱི་སྲུང་མ་དུར་སྨྱོན་དང་སེང་གསུམ། །ཆོས་བཞིན་གཡེལ་བ་མེད་པའི་སྟོངས་གྲོགས་ཤིག་མཛོད་ཅིག །ཨོ་རྒྱན་དུས་གསུམ་མཁྱེན་པའི་གནས་ཆེན་ལྔའི་ཡ་གྱལ། །ཐུགས་ཀྱི་དབེན་གནས་དུང་དཀར་གཡས་འཁྱིལ་དང་འདྲ་བའི། །ས་འཛིན་བ་གམ་ལྷུན་མཐོ་བར་སྣང་གི་དགུང་ན། །བྱིན་རླབས་ན་བུན་འཐིབས་པའི་ངོ་མཚར་གྱི་གནས་མཆོག །ཕུ་ན་ཤར་དུ་འོད་གསལ་ཆོས་རྫོང་གི་ལྷུན་པོ། །རྒྱབ་རི་རྡོ་རྗེ་ཕག་མོའི་རྣམ་པ་རུ་བརྗིད་ཆགས། །བར་དུ་གནས་མཆོག་ཁྱུང་གཤོག་ནམ་མཁའ་ཡི་རྫོང་ཆེན། །བྲག་རི་བྱ་ཁྱུང་བར་སྣང་ལྡིང་འདྲ་བཞིན་འཕྱོ་བ། །མདའ་ན་མཉམ་པ་མེད་པའི་སེངྒེ་ཡི་རྫོང་ཆེན། །ཞབས་ནས་འགྱུར་མེད་ཀ་བ་བཙུག་པ་ལྟར་ཆགས་ནས། །ཕྱོགས་བཞིར་རིང་བའི་གནས་བཞི་ཉེ་བ་ཡི་གནས་བཞི། །རྫོང་གསུམ་སོགས་ཀྱི་བསྐོར་བའི་ལྷོ་བྲག་གི་མཁར་ཆུ། །རི་རྒྱལ་དུང་དཀར་ལྟ་བུའི་ཞལ་བུག་གི་སྟེང་དུ། །སྤྱན་རས་གཟིགས་དངོས་འགྲོ་འདུལ་སྙིང་རྗེ་ཡི་དབང་ཕྱུག །ཀུན་མཁྱེན་པདྨ་དཀར་པོས་རྒྱ་ཆེན་གྱི་ཐུགས་བསྐྱེད། །བྱིན་བརླབས་ཕྱག་གིས་བཏབ་པའི་གཙུག་ལག་དེ་དྲན་བྱུང་། །གཙང་ཁང་རྟེན་གཙོ་ཨོ་རྒྱན་ཟ་ཧོར་གྱི་ཆ་བྱད། །ཐོག་ཚད་གསུམ་དུ་གང་བ་དེ་ཉིད་ཀྱི་ནང་གཟུངས། །མཚོན་གང་གུ་རུ་ཁྲི་ཁྲག་བཅུ་གཉིས་ནི་བརྒལ་ཙམ། །གཞན་ཡང་སྐུ་གསུང་ཐུགས་རྟེན་བསམ་ཡུལ་ལས་འདས་པའི། །ཚད་ལྡན་གཏེར་བྱོན་ངོ་མཚར་གྲངས་མེད་ཀྱི་བྱིན་ལྡན། །གཟུངས་ཞུགས་མཐོང་གྲོལ་ཨོ་རྒྱན་སྐུ་དངོས་འདྲའི་གཡས་སུ། །འོད་དཔག་མེད་མགོན་མཁན་པོ་ཞི་བ་འཚོ་གཉིས་དང་། །གཡོན་དུ་ཐུགས་ཆེན་ཡང་སྙིང་འདུས་པ་དང་ཆོས་རྒྱལ། །ཐོག་ཚད་ཙམ་རེ་ཁྱད་འཕགས་གཟི་བྱིན་གྱི་ཕུང་པོ། །དབུ་སྟེང་གསང་བ་འདུས་པའི་དཀྱིལ་འཁོར་གྱི་ཚོམ་བུ། །ལྡེབ་བྲིས་ཐོད་ཕྲེང་སྡེ་ལྔ་བླ་བརྒྱུད་དང་བཀའ་བརྒྱུད། །གིང་ཆེན་སྡེ་བཞི་གཏེར་སྟོན་རྒྱལ་པོ་ལྔ་བཞུགས་ཡོད། །སྔོན་གྱི་རྟེན་རྙིང་ཀུན་མཁྱེན་པད་དཀར་གྱིས་བཞེངས་པའི། །གསེར་ཟངས་བཅོམ་ལྡན་མི་འཁྲུགས་ཐོག་ཚད་གཅིག་ལྷག་ཙམ། །འཇིགས་རུང་ངན་སོང་འཇོམས་པའི་བྱིན་རླབས་ཀྱི་གཏེར་མཛོད། །ལྷོ་བརྒྱུད་འགྲོ་བའི་རྟེན་མཆོག་འགྲན་མེད་ཅིག་བཞུགས་ཡོད། །ནམ་སྙིང་སྐུ་ཕྲེང་དྲུག་པའི་གསེར་ཟངས་ཀྱི་མཆོད་རྟེན། །དཔང་དུ་མཐོ་ཚད་བཅུ་དགུ་ཁྱད་འཕགས་པའི་གཟུངས་ལྡན། །བྱེ་རུའི་སྡོང་པོ་དུང་དཀར་གཡས་འཁྱིལ་ལ་སོགས་པའི། །སྣ་ཚོགས་ནོར་བུའི་ཕྲ་རྒྱན་དཔག་མེད་ཀྱིས་མཛེས་བཞུགས། །དེ་སོགས་སྐུ་གསུང་ཐུགས་རྟེན་ཆེ་ཆུང་གི་སྣང་བརྙན། །བྱིན་རླབས་ས་སྟེང་འདི་ན་འགྲན་ཟླ་དང་བྲལ་བའི། །བགྲང་དང་ངེས་པ་བློ་ཡི་བསམ་ཡུལ་ལས་འདས་ཤིང་། །ངོ་མཚར་གསུང་བྱོན་རྣམ་པ་སྣ་ཚོགས་ཤིག་བཞུགས་ཡོད། །ཕུ་ཡི་རི་བོ་སྒྲོལ་མ་ཉེར་གཅིག་གི་རང་བྱོན། །ཧྃ་ཡིག་རྣམ་པས་མངོན་སུམ་གྲལ་རིང་དུ་བསྟར་བཞུགས། །གཡུ་ཡི་རྡོ་གཅལ་བཏིང་འདྲའི་གཡུ་སྒྲོན་གྱི་བླ་མཚོ། །དངུལ་གཞོང་ཇ་ཐང་བཀང་འདྲ་ཞིང་སྐྱོང་གི་བླ་མཚོ། །འཇིགས་རུང་མཚོ་ནག་རྦ་ཀློང་རྔམ་གཟིལ་དང་བཅས་ཏེ། །གློག་འཁྱུགས་ཉེ་སྐོར་རྩྭ་ཤིང་སྐམ་པོ་རུ་བྱས་པའི། །གཏེར་བདག་དགེ་བརྙེན་སྨྱོ་ཁའི་བླ་མཚོ་ལ་སོགས་པ། །སྒྲོལ་མའི་མདུན་དུ་ཡོན་ཆབ་ཕུལ་བ་བཞིན་མཆིས་སོ། །མདུན་གྱི་རི་བོ་རྒྱལ་བ་རིགས་ལྔ་ཡི་རང་བྱོན། །སོ་སོར་མ་འདྲེས་ལྷུན་པོར་བརྗིད་ཆགས་སུ་སྣང་བས། །དོན་ཡོན་གྲུབ་པའི་སྐེད་པར་རྒོད་ཚང་པའི་སྒྲུབ་ཕུག །སུ་ཡིས་མཇལ་ཡང་ཡ་མཚན་ཕུལ་ཕྱིན་གྱི་གནས་མཆོག །མདུན་ངོས་བྲག་གཡང་ལྟ་བར་མི་བཟོད་པའི་ལམ་འཕྲང་། །ཅུང་བགྲོད་བྲག་གི་བར་ན་དཀྱིལ་འཁོར་ཕུག་ཅེས་པར། །བདེ་གཤེགས་དཀྱིལ་འཁོར་ལྷ་བྲིས་མཁས་པ་ཡིས་བྲིས་འདྲའི། །ཨེ་མ་དེ་འདྲའི་རང་བྱོན་ངོ་མཚར་རང་ཆེ་འོ། །